(c) GFDL
Den 12. Juni 1982 stierft den éisträichesche Wëssenschaftler, Auteur an Nobelpräisträger Karl von Frisch am Alter vu 96 Joer. Hien huet 30 Joer domat verbruecht, d’Verhalen an d’Kommunikatioun vu Beien ënnert d’Lupp ze huelen.
Ah, ass et de Frisch deen e ganze Koup Bicher iwwert de Beiendanz geschriwwen huet?
Genee. Beien hunn nämlech en aussergewéinlech soziaalt Verhalen an tauschen duerch eenzegaarteg Danzschrëtt Informatiounen aus. Sou kënnen se sech zum Beispill matdeele wou genee se Nektar fonnt hunn, wéi gutt en ass, wéi vill es do ass oder wéi wäit et bis dohin ass. An déi Informatiounen si relativ komplex: och wann’s de der Bei den direkten oder einfachste Wee verspäers, fënnt se den Nektar awer!
Da schénge Beie jo clever Déieren ze sinn. An awer hunn se am Moment Problemer fir z’iwwerliewen.
Jo, Beien si ganz besonnesch Déieren: eisen Ökosystem, an domat eist Liewen, hänkt vill vun hinnen of. Vill Planze sinn op Beien ugewise fir befrucht ze ginn. Mee d’Dynamik vun enger Beiekolonie ass ëmmer nach net richteg verstan, an dofir ass et esou schwéier erauszefanne firwat genee se massiv ausstierwen.
...a wat mer dogéint kenne maachen. Selwer vill Blumme planze schéngt mer just eng kleng Plooschter op enger grousser Wonn ze sinn!
Auteur: Corinne Kroemmer
Editeur: Joseph Rodesch
Foto © GFDL
Infobox
1mol d'Woch présentéiert de Mr Science op RTL Radio d'Erfindung oder den Entdecker vum Daag.
Extrait “Vie et moeurs des abeilles”: http://www.albin-michel.fr/Vie-et-moeurs-des-abeilles-EAN=9782226187277
